Canolfannau Addysg Awyr Agored

Mae'r gwasanaeth yn gyfrifol am ddwy ganolfan gweithgareddau awyr agored. Mae  un ohonynt o fewn y sir ym Mhenffordd-las ger Llanidloes a'r llall ger Y Friog yng Ngwynedd.

Mae'r brif ganolfan yng Nghanolfan Addysg Awyr Agored Penffordd-las yn gyfle i ddianc rhag ardaloedd twristaidd Eryri a'r Bannau Brycheiniog, ond eto'n rhoi cyfle i droi llaw at antur awyr agored mewn sawl lle.

Rydym yn defnyddio Cronfa ddwr Clywedog lle mae gennym fflyd o gychod hwylio sy'n addas i'r dechreuwr neu'r mwyaf profiadol.  Rydym hefyd yn defnyddio'r llyn ar gyfer y caiacs a'r canwod, a'r rafftiau ar gyfer eu hadeiladu.

Os mai canwio neu gaiaco dwr gwyn yw eich diddordeb chi, yna mae'r ganolfan mewn lle delfrydol yng nghalon Dwr Gwyn Cymru.  Mae Afon Hafren ryw 15 munud i ffwrdd ac Afon Gwy yn 25 munud.

I feicwyr mynydd, mae cyfleoedd di-ri i feicio yng Nghoedwig Hafren.

Yn olaf mae Mynyddoedd Pumlumon a'r Cambrian ar garreg y drws i gerddwyr, sy'n cynnig diffeithwch prin sy'n wahanol i lwybrau cerdded treuliedig Parciau Cenedlaethol Cymru a Lloegr.

Mae'r llety ei hun yn adeilad modern, eang gyda lle i 50 mewn ystafelloedd gwely ar gyfer rhwng 2 a 6 o bobl.  Mae yna lolfa gyfforddus gyda thân bren, ystafell sychu, ystafell fwyta a chegin bwrpasol.

Mae'r ganolfan yn trefnu gwahanol fathau o gyrsiau addysg yn yr awyr agored yn bennaf i ysgolion a grwpiau ieuenctid Powys, sy'n cynnig antur, hyfforddiant Dug Caeredin, yr amgylchedd a hyfforddiant datblygu ieuenctid ac oedolion.

Mae gennym hefyd gyfleusterau cynadledda a llety ar steil 'byncws'.

Gallwch logi'r cyfleusterau ar gyfer cyfarfodydd tîm a diwrnodau i ffwrdd.  Mae'r ystafelloedd cyfarfod, y cymhorthion dysgu a chynadledda ac amgylchedd heb ffôn symudol yn golygu mai dim ond y golygfeydd fydd yn tynnu eich sylw.

 

 

 

Cyswllt:

Canolfan Awyr Agored Penffordd-las
Llanbrynmair
Powys, SY19 7DS.

Rhif ffôn: 01686 430630

staylittle.outdoor.centre@powys.gov.uk